هاام وارجو الدخول من جميع الاعضاء

بسم الله الرحمن الرحيم

اعضاء بلاك هورس

تحية طيبة و بعد:
انا عارف اني ممكن اطول عليكم بس يا ريت كل الاعضاء تقرا الكلام للاخر:


طبعا في البدايه بما اني مشرف قسم الرياضه
حبيت اقرر بعض القرارات في قسم الرياضه
وده طبعا بعد اذن الاداره ولو معندهاش مانع انا حابب اني انفذها

طبعا هيكون اولها اني عايز اوقف بصراحه المهزله اللي بتحصل في كل من منتدى الاهلاويه والزملكاويه والخناقات اللي ملهاش داعي في كل متشات الفرقتين
مش معقول كده قل اسبوع هنفتح خبر المفروض يترد عليه بكلمة مبروك او بالتوفيق او هارد لك
نخليه يتقلب خناقه
فبعد اذن الاداره انا كمشرف للقسم ده اي حد هيكتب كلام ملوش لزمه
يكون فيه استفزاز او كلام يعيب في الناديين الكبار انا همسحه
لان مفيش لازمه لاننا نكون اخوات واصحاب ويجي الموضوع ده يفرقنا ونتخانق فيه
وانا حبيت احط الموضوع ده عشان محدش بعد كده اي عضو لما يلاقي مشاركته ممسوحه
ميروحش يشتكيني للمدير
الكلام يبقى هادي ووجهة نظر تنفع الكل من غير تجريح في حد او استهتار بحد
يعني ميبقاش مثلا واحد اهلاوي يروح ويقول مثلا حسام حسن ده تعبان
ومدرب وحش
مهو طبعا جمهور الزمالك هيتكلم وهتبتدي الخناقه
او واحد زملكاوي يروح يقول على الاهلي نادي كوسه او نادي رشاوي
اكيد جمهور الاهلي مش هيسكت وتبتدي الخناقه
افتكر احسن لو الاهلي فاز ندخل ونقول مبروك بالتوفيق
ولو خسر نقول هارد لك
ونفس الحكايه مع الزمالك كده هيكون احسن والطف من الخناقات دي


ثاني حاجه بقى
الاخبار مش اي حد يتفرج على علاء صادق او غيره يلاقيه بيقول كلمتين ماشيين على هواه
يجي ويكتبهم
يا ريت نتاكد من صحة الخبر والافضل ان احنا نجيبه من مواقع اخبار مش منتديات كل واحد فيها بيكتب على مزاجه
ويتكتب تحت اسم المصدر اللي انت جايب منه
مش اي خبر يتحط
يعني مصحاش الصبح الاقي حد حاطت خبر ان احمد شكري عايز يمشي بكره من الاهلي
يبقى الخبر غلط ويتنقل مع احترامي للي كاتيه انا هشيله وامسحه
يعني يتكتب تحت الموضوع
منقول
المصدر فيل جول مثلا .اهلي نيوز.يلا كوره كده
ثالثا
وجهات النظر بتختلف وعمرها ما هتتفق بين الاعضاء
كل واحد يدخل ويكتب وجهة نظره بس بادب واحترام ومنغير تجريح في حد
يعني مافاجاش بكره ان الخناقه هتقوم عشان حد كاتب الاهلي اكبر فريق في مصر
او الزمالك اكبر فريق في البلد
كل واحد له وجهة نظره ولازم نحترمها ومتستهترش بيها

رابعا بقى
في كل المنتديات الخناقات اللي زي دي بتعتبر تجاوز من العضو
وبيترتب عليها عقوبات
والعقاب بردو بعد اذن الاداره على المواضيع دي هيكون خصم من نقاط التميز او نقاط مسابقة التوقعات
وطبعا كلامي ده كله بعد اذن الاداره


يعني من الاخر كده
ومع احترامي وبعد اذن الاداره طبعا
اي حد هيكتب كلام يستفز بيه الطرف الاخر والاقي خناقه هتقوم في خبر من سطرين
انا همسح المشاركه وانا حبيت اكتب الموضوع ده
علشان اي حد يلاقي مشاركته ممسوحه ميروحش يشتكيني
مش عايزيين خناقات بينا وبين بعض في الاول والاخر احنا اخوات واصحاب وكمان مصربيجمعنا في الاخر علم مصر

وممكن حد يفتكرني بالموضوع ده متطفل او اي حاجه ممكن تيجي على دماغكم
انا بس بعمل كده عشان مينفعش نكون اصحاب واخوات ونتخانق كده
احنا اخوات ونتمنى التوفيق للكل

اولا مع احترامى لرأيك لكن انا شايفه ان ده مش خناقات بالعكس ده مجرد نقاشات وابداء لوجهات النظر
مش اكتر لكن لكل واحد الحريه فى ابداء وجهة نظره مدام مش بيغلط فى حد وبالعكس انا شايفه الموضوع ده
عامل جو لزيز فى المنتدى مش المفروض كل رودودنا تكون تسلم ايدك مرسىىىى مبروك بالعكس المنتدى الناجح فيه ابداء اراء و نقاشات ممكن توصل 5- 6 صفحات وحكاية المصدر ده والله كل واحد حر فى انه يقول المصدر او لاء والموضوع اللى انت شايفه مش واقعى مش تصدقه لكن انا شايفه انه مش من حق اى حد يقولك حط ومتحطش
مع احتراااامى لجميع وجهات النظر طبعااا وسورى ممكن اكون طولت عليك
تقبل مرورى

اولا متقبل مرورك
ثانيا النقاش المفيد ميبقاش بالاهلي بيفوز بالحكام الاهلي نادي كوسه
الزمالك ده تعبان روحوا شوفوا حسام حسن اللي مبيفهمش عمر ما ده يسمى نقاش ده اسمه ومع احترامي هبل
النقاش الموضوعي انك تطلع الغلط وتحاول تصلحه
مثلا اداء الاهلي وحش في الفتره الخيره اللي بتعملوا روحوا شوفوا ناديكم بيكسب بالكوسه ومبيعرفش يلعب وكل بطولاته دي من تحكيم تفتكري ده يسمى نقاش امال لما تتكلموا في الاسباب تقولوا مثلا بادب المدرب ميصلحش وواحد تاني يقول الاعيبه متهاونه وتتناقشوا هوه ده النقاش انما اللي بيحصل لو حضرتك دخلتي اي منتديات محترمه
هتلاقيهم بيحطوا عقوبات على الكلام من النوع ده
وحكاية جو لزيز الجو الزيز هيحصل لما نتكلم بعقل ومنطق ونتفاهم مع بعض ونكون كلنا متفاهمين
اما عن المصدر حضرتك حطيتي قبل كده خبر كان هيقوم الناس على بعض بتاع احمد شكري اللي حضرتك حطيتيه وانا شلته واشتكيتيني لرئيس المنتدى
والخبر طلع كااااااااااذب مع احترامي ليكي
حكاية المصدر دي بتتحط لما يكون الاخبار من موقع معتمد يكون الخبر على ذمته كاتبه
مش اي كلام الكل يقوله ما انا ممكن اقولك بكره حازم امام راح الاهلي هقوم الناس والخبر غلط
بعدين مع احترامي لرايك طبعا بس انا بعمل ده عشان المنتدى بتاعنا وانا مصر عليه لانه الصح
نورني مرورك

اولا احنا مش غلطنا لما قولنا الاهلى بيكسب بالحكام وانتو عرفين ان ده صح مليون فى الميه
تانيا الخبر اللى حضرتك بتكدبه ده من موقع اهلى نيوز اتأكد من الكلام حضرتك قبل ما تقوله
ونفس الخبر قرأته فى يلاكوره ولو انت فعلا بتحب النقاش المحترم الهادف مكنتش كتبت فى موضوع ماتش
الاهلى وانبى ان ده تهاهة عياال عيب احنا اكبر منك والمفروض حتى بعيد عن السن النقاش يكون بأدب وبكلام
لائق ومقبول

لما الاقي خناقه حضرتك واختي وغيركم مقومينها على ماتش خلص بنتيجه غلط

تفتكري ده نقاش تفتكري ده لعب عال ولا لا بعدين حضرتك لو كنتي في منتدى تاني واتكلمتي انتي او غيرك بالشكل ده هيدوكي حاجه اسمها انذارات ولما تكملي 3 انذارات هتطردي من المنتدى
الخبر اللي حضرتك كتبتيه كان كاذب
والدليل لسه احمد شكري كان على دكة الاهلي امبارح
اما بالنسبه لحكايهة الاهلي بيكسب بالحكام فدي هعديهالك لاني مش عامل الموضوع ده عشان انا اتخانق
وبعدين انا مش حاتط خبر انتي تردي عليه وتقولي بيفوز بالحكام وبيفوز بالبتاع دي قوانين وحضرتك وغيرك لازم تحترموها
لان ده هيكون الافضل للمنتدى بتاعنا
وحكاية اكبر مني دي انا اللي اصغر منك مش بتخانق في منتدى الاهلي والزمالك
والقرارات دي محترمه جدا ولو دخلتي منتديات مصر كلها هتلاقيها كده في المثبتات
وابقي ادخلي وشوفي

اولا انا محترم وجهة نظرك يامحمد
ثانيا كلام وايت صح اى منتدى مش بيكون ناجح الا بالنقاشات والاراء اللى فية
مش كل شوية نقول تسلم ايديك وكدة
لا لازم يكون فية نقاشات واراء
بس شرط تكون فيها احترام والتزام من كل الاعضاء لبعضهم
واللى هيخالف دة هيتعرض لعقوبة
وياجماعة كلنا لازم نبقى ايد واحدة عشان خاطر منتدنا

انا معاك يا كبير
وده اللي بقوله يبقى فيه نقاش
بس بادب واحترام
وبدل انت موافق انا اي حد هيحط حاجه تخالف القوانين دي
اسمحلي ان انا امسحها وهكرر تاني
كل واحد يخلي باله من الكلام اللي بينقله ويكتبه
عشان اي حد هيخالف القوانين دي فعلا هتتمسح مشاركته
وكمان هيتعرض لعقوبات
اللهم بلغت اللهم فاشهد
عشان بعد كده محدش يروح لاحمد ويشتكيني

بس ياريت نحترم الكلام دة